هل أعيش قصة حب أم قصة وهم؟؟ ساعدوني كيف أنساه؟!

وصلت الى احدى المواقع الالكترونية , و هذا الأسبوع رسالة من فتاة لا تعلم ما إذا كانت تعيش "قصة حب" أم "قصة وهم" مع شاب يعمل لدى والدها.. هذه العلاقة جعلتها لا تكف عن التفكير به، وسلب من عينيها النوم، وتركها في حيرة من أمرها.. وفي ما يلي القصة الكاملة والرسالة التي كتبتها الفتاة ننشرها كما وصلتنا.

السلام عليكم.. قبل ما بلش بقصتي حابة اشكركل حدن بدو ينصحني.. انا متلي متل كل هالبشر عندي مشكلة وشايفتها كتير معقدة ما بعرف اذا حتشوفوها متلي بس انا هيك شايفتها!! والقصة هي انو انا من قبل فترة حبيت شخص حب جنوني بالاول ما كان بيعنيلي اي شي كنت دائما شوفو لانو كان بيشتغل عند بابا بس ما كنت حس تجاهو شي.. بلش حبي إلو لما حسيت انو هو  مهتم فيي بظن انو كل بنت عرفانة كيف الشب بيهتم فيها وكيف بيحاول يفرجيها انو هو اما معجب فيها او بيحبها وانا هيك صار معي صرت حس انو كتير عم يهتم فيني وكان حافظ كل مواعيدي ودائما بيطلع بوشي وبيتطلع فيني نظرات كنت حس انو فيها كل الحب..

للاسف كنت مفكرتو بيحبني بس طلع لاء يا اما اعجاب ويا اما ما بعرف.. بدي وضح شغلة اني انا من عيلة محافظة وما عنا شي بالعيلة اسمو علاقات عابرة بين الشباب والبنات انا تربيت على هالاساس وبحمد ربي لاني هيك تربيت وعلى هالاساس عشت كل حياتي مع انو كان في ناس بشوفونا متخلفين لانو هيك منفكر بس انا ما همني كلامون لانو هالشي الله حرموا ومو قبلان فيه بنوب لذلك انا واثقة من حالي وما عم اخجل من تفكيري هاد اللي عم يسموه تخلف حتى لو كان تخلف معليش خليني هيك مو مشان شي بس لاني بعرف ومتاكدة انو اللي بعملو هو الصح..

المهم وبحكم هالشغلات اللي حكتلكون عنها ما حكيت معو ولا هو بادر انا ما كنت طالبة منو علاقة ويصير يحاكيني ويتسلى.. بس كان بدي اعرف اذا بيحبني او لاء.. يمكن هو ما قلي لانو خجل بما انو بيشتغل عند بابا او يمكن لانو حالتو المادية مو متلي ويمكن ما حبني من الاساس.. ما بعرف يمكن هيك ويمكن لاء المهم ضلينا هيك فترة يعني نظرات واعجاب بس بعدين انقطع فجاة اتغير كتير وما عدت شوفو ابدا ما كان عم يورجيني حالو وانا كنت عم انقهر..

كنت بقول خانني وصرت اكرهو او كنت مفكرة حالي كرهتو لبين ما شفت قصة بنت قصتها كتير بتشبه قصتي هي كمان كانت بتلوم الشب مع انو الشخص اللي انا بحبو واللي هي بتحبو ما قالولنا انو بيبحبونا لذلك بطلت حط الحق عليه وصرت عم حاول انساه فكرت حالي عم اتحسن وعم انساه يوم ورا يوم لبين ما اجا هاليوم اللي شفتو فيه (نسيت قلكون انو كل ما كنت بشوفو كان قلبي عم بيدق بسرعة) ايه ولما شفتو بعد طول غياب وبعد فترة طويلة صرت عم برجف ودق قلبي اسرع من قبل كنت متوترة بشكل ما ممكن حدا يتخيلو وهالشي قهرني كتير لاني كتير اتعذبت لحتى حاول انسااااااااااه وبالاخير لما شفتو صرت اجن من الاول ..مشان الله قلولي شو اعمل والله حياتي صارت تعيسة بسببو..

ما عم بقدر عيش حياتي ولا بقدر اعمل اي شي.. الشي الوحيد اللي عم بعملو انو طول الوقت ببكي وبنقهر وهو عايش حياتو ولا هامو (انا والله بحبو لو بيطلب مني روحي بعطيه بس شو الفايدة من هالشي) يا ناس كرمال الله ساعدوني وانصحوني كيف فيي انساه بما انو مو قادرة اتاكد من حبو.. نسيت قلكون انو كان عم يتطلع فيني متل قبل يعني نظراتو ما اتغيرت  بعد هالفترة الطويلة.. انا صايرة متل المجانين بس بدي افهم ليش هيك اذا بيحبني او عالقليلة معجب ليش هيك عم يعذبني وبيبعد عني واذا ما بيحس بشي تجاهي ليش عم يخليني حس باهتمامو …صايرة عم شك بحالي لانو يمكن هي كلها ولدنة مني بما اني مراهقة وعمري 17 سنة يعني الكل بيقولوا حب المراهقة مو حب حقيقي اذا مو حقيقي لكان شو هاد اللي عم حس فيه واللي قالبلي كل كياني اه!!

الشي الوحيد اللي بعرفوا انو دمرني ودمر حياتي ودمر ثقتي بالناس وبالحب وبكل شيييييي…اذا قصد او ما قصد صار اللي صار ودمرني ما بظن انو كتير رح تفرق اذا كان قاصد او لاء.. انا كتييييييييير مخنوقة. عنجد بعتذر على هالاطالة بس كنت كتير بحاجة انو فضفض لانو ما عم بقدر فاتح حدا بهالموضوع …شكرا (وجعتلكون راسكون).