علّقني فيه وانسحب.. كرهت الحب لأجله.. تعبت وانجرحت كتير!!
تلفزيون الفجر الجديد
رسالة وصلت احدى المواقع الالكترونية …السلام عليكم جميعا.. ولكل شخص بدو يتوجه لي بالنصيحة.. ثانيا اسمحوا لي أن أكتب بالعامية فقد يكون أسهل بالنسبة لي وآمل أن تتفهموني.. "انا بنت عمري 17 سنة قبل نحو سنتين حبيت ابن الجيران كتير لاني كنت مفكرة ان الشعور بالحب متبادل بيننا بعد ما كان يلاحقني وعم يظهر لي انو بيحبني.
"كان دائما يلحقني ويطلع بوجهي وين ما رحت بالاول كنت متضايقة منو بس شوي شوي صرت متعلقة فيه وما بقدر يوم ما شوفو.. وضلينا هيك فترة ما بعرف اذا هو حس اني بحبو او لا المهم نحنا هون عايشين ببلدة كتير صغيرة وعنا كل الناس بيعرفوا بعض لذلك كان من المستحيل انو شي بنت تحب حدا او شي شب يحب بنت ويعترفلها بحبو اذا كان في حدا بيحب شخص بيضل هالحب بقلبو وهاد عذاااااب كبير وانا ما اتحملتو بس ما كان فيي اعمل شي فمشان هيك وبحكم العادات والتقاليد لا قرب مني ولا قلي شي كلمة وانا نفس الحكي ما حكينا ولا مرة لو عملنا هيك كان يا ويلنا من الناس وحكيون.
فضلينا هيك فترة منيحة وكل يوم كنت أحبو اكتر واكتر على اساس انو هو كمان بيحبني ما كنت عرفانة انو هو بدو يتسلى فيني بدو يلعب فترة وبعد ما يمل بدو يتركني فبالظاهر مل حتى قبل ما يبلش وتركني صرت ما عاد شوفو الا بالصدفة كل يوم كنت طالعلو شي ميت حجة وحجة.. بالمختصر كنت عم اكذب على حالي حتى ما اسمح لنفسي اني انزعج منو او اكرهو بس خلاص نفد صبري وما عاد اتحمل اكتر صرت اكرهو وحبو صرت ملخبطة كتير ومو عرفانة شي كان اول شب واول حب بحياتي تعلقت فيه كتير وحبيتو بجنون كنت دائما طير من الفرح لما شوفو كنت عم برجف ما بعرف شو كان بيصرليوانا هلا مجروحة كتييير وموجوعة ما عم بقدر ركز على اي شي بفكر فيه عم اسال حالي ليش يا ترى هيك عمل فيي ليش خلاني حبو وتركني ليييش؟
بس بدي افهم انا هلا طالبة بكلوريا وحابة ركز على دراستي بس ما عم بقدر مشان الله حدى يساعدني قلولي كيف فيي انساه كيف فيي ارجع لطبيعتي يعني متل ما كنت قبل ما شوفو عم حاول كتير اني انسى بس ما عم بقدر عم بجي لداوي قلبي بشوفو مجروح وموجوع بشكل مو ممكن حدا يتخيلو ..انا والله العظيم ما رح سامحو طول ماني عايشة ..خلاني اكره شي اسمو حب خلاني اتاكد من انو ما في شي اسمو حب كلو هالحكي كذب بكذب ما في لا حب ولا غيرو لانو كل الناس صايرة خونة.. لك حتى خلاني ما طيق الشباب فقدت ثقتي بكل الشباب مع اني بعرف انو ابدا مو الكل متل بعض بس ما عم بقدر فكر غير هيك.. انا كتير اسفة عالاطالة بس عنجد كنت محتاجة لاني فضفض بلييييز ساعدوني …وانصحوني ..شكرا لكل اللي اهتم بمشكلتي وبدو ينصحني بليييييز انشروا قصتي بسرعة ….