مخرج “سيب إيدي”: أنا أحارب الإسفاف بالإسفاف

في تعليق غريب على كليب أغنية "سيب إيدي"، قال وائل صديقي مخرج "الكليب الأزمة" إنه كان يحارب الإسفاف، ضمن خطة العلاج بالصدمة.

صديقي قال في على حسابه بـ"فيس بوك": "محدش صدقني لما قولت إني بحارب الإسفاف بالإسفاف وأن في حاجة اسمها العلاج بالصدمة، يلا نقلب عاليها واطيها، حقي في بلدي ومش حسيبه".

وأذاع صديقي فيديو جديدا قال فيه: كان نفسي أوضح الهدف الحقيقي داخل مصر، ولكن هناك حرب ضدي من (مافيا) محتكرة صناعة السينما والتوزيع وحتى التصوير كلهم أسرة واحدة. الهدف الحقيقي من (سيب إيدي) واللي أول مرة أقوله، الشهرة، ليه اتشهر مش علشان الناس تتصور معايا في الشارع، لا علشان توصل رسالتي لرئيس الجمهورية".

وأضاف: "أنا ياريس جيت من أمريكا من سنة ونص علشان أديك صوتي، ودلوقتي أنت مُطالب تقف جنبي، عملت شغل كتير ومحدش عرفني، حاولت أخد حقي وأطلع أفلام علشان الناس تعرفني واشتغل في المجال اللي بدرسه، وعرضت فلوس كتير عليهم وبرضو رفضوني، الهجوم اللي عليا دلوقتي ده شيء غريب يا ريس لأنه حصل في الأفلام والكليبات أكتر من الكليب بتاعي، علشان فيه ناس في مافيا السينما في مصر واقفين ضدي".

وتابع: "ورايا أجيال ياريس تخرجوا من معاهد السينما، ومنتظرين الفرصة، أعرف ناس كتير يا ريس ومخرجين وشغالين كومبارسات، ليه علشان بقالنا 50 سنة نتفرج على نفس الناس، الناس دي لما كبرت دخلوا ولادهم".

وتابع: "بقالي سنتين يا ريس في مصر، لازم تعرف المشكلة دلوقتي أنا بفتح النار على كل صناع السينما لأنهم سبب في ضياع أجيال كثيرة، وانتشر التحرش والبلطجة، القائمين على السينما أصلا ليسوا سينمائيين، الوسط السينمائي ممكن يجيب لمصر فلوس أكثر من قناة السويس، طالب مساعدتك ياريس لوضع تصور يخلي السينما تدخل مليارات".