طريقة عمل دجاج مندي بالفرن

تلفزيون الفجر الجديد| المقادير :

 حبتين(2) بصل مقطعة حلقات
 زيت طعام
  كمون
 بهارات مشكلة
 ملح
 فلفل اسود
 دجاج صدور او كامل بالعظام
  رز منقوع في مياه حاره مو اقل من نص ساعة.

طريقة التحضير

1- اذا استخدمتي الدجاج الكامل غسليه مزبوووط بشويه خل وبعد ماتغسلية قطعية ارباع وسوي بالسكينه خطوط على الدجاج زي كذا \ عشان البهارات تدخل جوا وتبليه بالبهارات المشكله وشويه ملح وفلفل اسود… كويس كذا؟؟
واذا استخدمتي الصدور قطعيها مربعات بس مو صغير وسوي نفس الطريقه مع الدجاج الكامل اللي فوق وتبليه بنفس الطريقه

2- جيبي البصل الحلقات وحطيه في قدر وحطي عليه شويه زيت وقلبيه لحد ما يصير لونه ذهبي او احمر.
وانتي قاعده تقلبيه حطي شويه كمون وشويه ملح بعد ما يستوي البصل تكوني مجهزه مياه مغليه وتحطيها على البصل على قد كميه الرزاللي نقعتيه…
بس بدون ماتحطي الرز طبعا
المهم بعد ماتحطي المية خليها تغلي عالنار دقايق وشيليها

3-  تجيبي الرز وتصفيه وتحطيه في صينيه بايركس

4- جيبي القدر اللي فيه البصل والميه وذوقيه شوفي اذا ناقص ملح ولا لأ واذا ناقص حطيله شويه ملح

5- شيلي البصل من الميه بالمصفاه خلاص مانحتاجه وحطي الميه على الرز بس لاتكتري الميه خليه بس يغطي الرز بــ2 سانتي بس

6- بعد ماتحطي الميه جيبي قصدير وغطي الرز كويس …وبعدين جيبي سكينه واقعدي خرمي القصدير سوي اخرام كتير…وبعدين جيبي الدجاج المتبل وحطيه فوق القصدير وبعدها جيبي قصدير تاني وغطي الدجاج

7- ودخليه الفرن لمده ساعه وبعد ماتخلص الساعه شيلي القصدير اللي فوق اللي كان مغطي الدجاج وخلي الدجاج يتحمر من فوق شويه
وجيبي قطعه فحم وحطيها على النار

8- شيلي الدجاج وحطيه على جنب وجيبي قطعه قصدير وسويها على شكل فنجان قهوة وحطي فيه شويه زيت وشيلي القصدير من على الرز وحطي قطعه القصدير اللي سويتيها على شكل فنجان في وسط الرز وامسكي في يدك التانيه غطاء قدر يكون قد الصينيه البايركس او اي شي يمديه يغطي الصينيه ضرووري هاا؟
وجيبي قطعة الفحم اللي حطيتيها على النار بعد ماتكون حمرا

9- حطي قطعه الفحم في الفنجان اللي فيه الزيت وبسرعه غطي الرز هاذي الخطوة ضروريه وخلي الغطا لحد ماتيجي تتغدي.