تزوجته رغم عدم رضا أهلي وهو يخونني ويعاملني كالجارية!

تلفزيون الفجر الجديد

رسالة وصلت احدى المواقع الالكترونية …السلام عليكم جميعا.. ولكل شخص بدو يتوجه لي بالنصيحة.. انا عمري 20 سنة، وعايشه بدوله اوروبيه تزوجت قبل سنتين تقريبا وكان زواجي غير طبيعي.. صار بسرعه وصار فجأه، وانا وزوجي كنا نحب بعض من قبل  وتعرفنا على موقع  الفيس بوك.. هيك بلشت علاقتنا من أصدقاء لعشاق.. اول مشكله هي انه هو مش من بلدي الاصلي وتاني شي قوميته بتختلف عن قوميتي.. بس الواحد لما يحب يترك كل شي وراه.. هو كان عايش بمنطقه كتير بعيده عني بعد ما تعرفنا بشهرين انتقل للعيش بنفس منطقتي.. وطلب مني انو نلتقى طبعا وقتها كنت عشقانه وفكرت انو الموضوع كتير عادي والتقيت فيه اول يوم وتاني يوم..

وبعدين تقدملي بين ما انا كنت بقول خليها لبعدين.. بس هو كان يقول انو نتزوج احسن وانو ما فيه يعيش بدوني.. طبعا اهلي رفضوا وانا صديتهم وقلت يا هو يا بموت.. وانا عند اهلي البنت المدللة اللي بحياتهن ما رفضولها طلب.. فتم الزواج بطريقه غريبه اخي زعلان وابي مش راضي بس تم الزواج!!

بعد شهرين من زواجنا بدأت المشاكل.. واول مشكله هي اكتشفت انو زوجي كان بعلاقه في بلده وانو وعد بنت بالزواج وانو بخاف عليها ويوم فاتحتو بالموضوع عصب وطلع من البيت بعدها رجع وقال لي أعطيني وقت خليها تخلص هالسنه هاي عندها بكلوريا، واذا قلتلها ممكن ترسب!! استغربت بس ما تحملت واتصلت مع البنت وقلتلها وحكيتلها القصه.. هي ما صدقت لأنها متعوده بنات يدقولها ويحكولها هيك كلام. طبعا طلبت منو يتصل هو اذا بحبني! طبعا عمل هالشي وخلصنا واخيرا ارتحت.. بس ما مر شهرين وبدأ بعلاقه تانيه عبر النت وتالته مع بنت اجنبيه .. انا سألتو  ليش هيك عم تعمل رد علي انو هاد طبعي!

قلتلو طيب ليش تزوجتني قال لي لأني كنت بدي ياكي!! طبعا اسئلة كتيرة وجهتها الو هل أنا حارمتك من شي أو مقصرة بشي.. وجوابه كان انت كتير منيحه وانا ما بستاهل هيك !! كل مره كنا نزعل ونرجع لاخر مشكله صارت وطلبت منو يطلع واتصلت بأخيه وقلت له شو عم بصير معي. طبعا اخوه قال لي انا ما فيني اضمنلك ياه وانا بعرف انو اخي كذاب وما حدا يثق فيه!!

وقال لي ما عاد تتصلي معي بعد اليوم.. هاي كانت اكبر صدمه طبعا اهلي ما بعرفو بالامر لأني اذا حكيت حتى اذا حكو معو او ساعدوني رح يضلو يقولو بتستاهلي انت اللي اخترتيه فانا صرت كتير بعيده وكتير تعبانه!بعد ما طلبت منو يطلع من البيت.. طبعا طلع وبهديك الليله اتصل بي وكان سكران وقال انو كنت ناطر هاللحظه من زمان وانا طبعا ردي كان انت اخدت اللي بدك اياه هلأ لشو بتتصل!! وتاني يوم اتصل بي كمان مرة وثالث يوم كنت بالشغل واتصل بي وطلب يشوفني بعد الدوام طبعا انا ما رفضت وطلب مني السماح وانو ما فيه يعيش بدوني ومن هالحكي!!

انا بحبو وبحبو كتير سامحتو اكتر من مره وسامحتو هالمره كمان.. بس ما عاد فيني اتحمل وبنفس لوقت خايفه.. خايفه من بكرة!! خايفه من اللي ممكن يصير!! مع العلم انو هو عمرو 24 هلأ  وانا عم قول كل يوم عم يكبر وينضج رفقاتي اللي بعرفو بالمشكل واللي بعرفوه شخصي بقولو مستحيل يتغير ولا تضيعي عمرك ولا تجيبي ولاد!! انا نفسيتي تعبانة ومدمرة.. وبشك بكلشي عم يعمله. ما بصدق اللي بحكيه.. بس طبعا ما بقول له.. وبضحك وبحكي كأنو ما في شي والمشكله التانيه انو حاولت كل الطرق انو خليه يحس انو انا ماني زلمة انو انا بنت انو محتاجي حنان وتفاهم وحكي.. هو ما بسمعلي ابدا .. وبعد دوامه بيجي على النت وبقعد يحاول يغير جو بقول له خلينا نتفرج على فيلم او هيك بعصب! انا محتارة ومحتاجة نصيحة محتاجة مساعدة