رسالة لطالب التوجيهي: بين التوجيهي وباب الجامعة.. كيف تختار تخصصك
بقلم: علي أبو خليل باحث دكتوراه في إدارة الموارد البشرية عضو المكتب التنفيذي للمجلس الوطني الشبابي الفلسطين
خلصت توجيهي، ونزلت النتائج، وكل واحد صار يحلم بالمستقبل. فرحة النجاح بتخليك تنسى هموم الدنيا، لكن بعد هدوء الأجواء، بتبلش الأسئلة الثقيلة: شو بدي أدرس؟ أي جامعة؟ وأي تخصص راح يضمنلي مستقبل؟
هون بتخلص مرحلة المدرسة اللي كل شيء فيها مضمون ومرسوم، وبتفتح صفحة جديدة اسمها الجامعة، وهون الدنيا بتصير واسعة، والخيارات كثيرة، والقلق بزيد لأنك بتحس إنك واقف على مفترق طرق، وأي خطوة غلط ممكن تندم عليها طول عمرك.
وعنا بفلسطين، مع كل التحديات اللي بنعيشها من وضع اقتصادي صعب واحتلال وضغوطات حياتية، موضوع اختيار التخصص بصير أكثر حساسية، مش بس بدك تختار شيء بتحبه، لا، بدك تختار إشي إله مستقبل بسوق العمل.
الموضوع مش سهل، وبحتاج منك وقفة تأمل، وتفكير بعيد عن ضغط الأهل أو تقليد الأصحاب. النجاح بعد الجامعة مش مرتبط بالمعدل بس، ولا بالشهادة، بل مرتبط إنك تكون اخترت الصح من البداية. ولهيك في أربع ركائز أساسية لازم تاخدها بعين الاعتبار قبل ما تسجل بأي تخصص.
أولًا: اعرف سوق العمل الفلسطيني
قبل ما تختار تخصصك، اسأل حالك: شو الوظائف المطلوبة اليوم؟ وشو راح تكون مطلوبة بعد خمس سنين؟ لأن سوق العمل في فلسطين متغير، وفي تخصصات صارت متشبعة، وفي تخصصات ناشئة عليها طلب.
مثلًا، اليوم في طلب كبير على مهندسي الحاسوب، ومطوري التطبيقات، ومحللي البيانات، والأمن السيبراني، وكمان التصميم الداخلي والطاقة المتجددة. وبالمقابل، في تخصصات تقليدية ممكن تواجه صعوبة بالتوظيف إذا ما كان عندك ميزة إضافية.
نصائح عملية:
- تابع أخبار سوق العمل.
- اسأل خريجين من التخصص اللي ببالك.
- راقب إعلانات الوظائف واعرف أكثر المهن المطلوبة.
- لا تعتمد على فكرة “بس أتخرج بتوظف أو بسافر”، لأن الواقع غير هيك.
ثانيًا: اختار تخصص يناسب شخصيتك
في ناس بتدرس محاماة وهي أصلاً بتخاف تحكي قدام الناس، أو بتختار تسويق ومبيعات وهي ما بتحب التعامل مع الآخرين، وهاد بخلي الدراسة والشغل عبئًا نفسيًا.
اسأل نفسك:
- أنا جريء ولا خجول؟
- بحب أشتغل مع الناس ولا لحالي؟
- بقدر أتحمل الضغط؟
- عندي صبر على الأطفال أو المرضى؟
إجاباتك راح تساعدك تختار التخصص المناسب.
ثالثًا: خلي تخصصك متناغم مع حياتك الاجتماعية
في تخصصات بتحتاج شخصية اجتماعية، مثل إدارة الأعمال، والموارد البشرية، والتسويق، والصحافة، والعلاقات العامة.
وبالمقابل، في تخصصات تحتاج هدوء وتركيز مثل البرمجة، والمختبرات الطبية، والبحث العلمي، والمحاسبة.
النجاح الحقيقي إنك تكون مرتاح في شغلك، وتوازن بين حياتك الاجتماعية ومهنتك.
رابعًا: شغفك هو مفتاح الإبداع
لما تدرس تخصص بتحبه، راح تروح على الجامعة بشغف، وتتعلم أكثر من المنهاج، وتطور نفسك باستمرار.
إذا بتحب الرسم، ممكن تدرس هندسة معمارية أو تصميم جرافيك. وإذا بتحب الكتابة، فالصحافة أو الإعلام خيار مناسب. وإذا بتحب التعامل مع الناس، ممكن تدرس الخدمة الاجتماعية أو السياحة والفنادق أو التسويق.
لكن انتبه، الشغف وحده مش كافي، لازم يكون إله فرصة حقيقية في سوق العمل أو تقدر توظفه بطريقة مناسبة.
كلمة أخيرة
اختيار التخصص مش قرار سريع، ولا لازم يكون تحت ضغط الأهل أو الأصدقاء. خذ وقتك، استشر، اقرأ عن التخصصات، وشاهد تجارب العاملين فيها.
وتذكر دائمًا: النجاح الحقيقي مش بس بالمال، النجاح إنك تكون مبسوط بشغلك، ومتحمس تروحله كل يوم، وتحس إنك بتقدم شيء مفيد لنفسك ولوطنك.
فلسطين بحاجة لشباب واعٍ، فاهم قدراته، ومختار طريقه بذكاء. بلدنا بحاجة لأطباء مخلصين، ومهندسين مبدعين، ومعلمين شغوفين، ومبرمجين متمكنين، وكل واحد في مكانه الصحيح.
توكل على الله، واستخِر، واختر الصح، والباقي على الله. والله يوفق الجميع لما فيه الخير
